A Sicilia Aspetta

di Mary Tolaro Noyes

Celu chiusu, niuru comu chiddu di Noè
ca penni ddà,
terra grigia nta distanza grigia sfucata --
mentri unni giganti sbattulianu u ferribbottu comu frasca
a ventu friddu ntrasi nte capiddi e robbi.

Dabbanna di lu strittu di Missina
a Sicilia aspetta . . .
terra grigia nta distanza grigia sfucata,
c'aspetta cu pacenzia, sempri cu pacenzia.

Sula mentri momenti s'accavaddunu, a tristizza
granciulia cu jidita friddi attornu a l'anima
dumanni senza risposta,
timuri ribbugghiunu nto cori.

Ventu, friddu, lacrimi, terra grigia
nta la distanza grigia sfucata
intristisciunu u sognu di la terra
d'oru.

Nta nenti u grigiu diventa d'un culuri biunnu di frummentu.
U celu si movi, pittannu lu grigiu
en macchi di biancu e d'azzolu.
Prumissa.

Scinninu brazza di suli di lu celu autu
e squarcianu lu grigiu di lu celu,
manciannusi lu scuru, iccannu
granni circuli sfavillanti
supra mari e terra scuri scuri
ca a picca a picca si inchinu di oru.

U ferribbottu arriva o portu,
ca lu jornu riluci di suli e l'anima respira
la gioia di lu cori spremi
lacrimi cauddi, benvenuta
un abbrazzu.

(tr. Gaetano Cipolla, editore di Arba Sicula.)